22 мамыр күні Республика сарайында әнші-сазгер Гауһар Әлімбекованың «Анаға сағыныш» атты шығармашылық кеші өтеді.
Айта кетерлігі, Гауһар соңғы жеті-сегіз жылда әндері жұртшылық тарапынан жоғары бағаға ие болып жүрген, туындылары басқа ешкімнің қолтаңбасын қайталамайтын талантты сазгер.

Екіншіден, ол – сыршыл да сұлу әндерін нақышына келтіре отырып келістіре шырқай алатын шебер әнші де. Үшіншіден, өзін көрсетуге барын салып, эфирге өңмеңдеп ұмтыла беретіндердің қатарынан емес. Әр әнін шыңдап-шынықтырып, әбден әрі мен сәнін келтіріп барып, көрерменге ұсынатын еңбекқорлығы тағы бар. Сол себепті де, музыка мамандары оны ұлттық эстрададағы талғамды өнерпаздардың тобына қосып жүр. Біз кеш алдында ән әлемінде осындай өзіндік әдемі өрнегі, үні бар, гитараның сүйемелдеуімен айтатын сыры бар, көпшілікке «Қыз сезімі», «Ақ келін», «Көктемге хат», «Оралшы, махаббат», «Әкеге сағыныш», «Жазығым не?», «Көктемгі жаңбыр» сияқты туындыларымен жақсы танымал Гауһармен аз-кем сұхбаттасып, концерттің жай-жапсарын сұраған едік.

– Бұйыртса, өз тыңдар­ман­дары­ма арнап екінші шығар­ма­шылық кешімді тарту етпекпін. Ес­теріңізде болса, алғашқы кон­цертім 2007 жылдың басында өт­кен болатын. Одан бері арада екі жа­рым жылдай уақыт өтті. Бұл үне­мі өсуге, ізденуге талпынып жү­ретін шығармашылық адамы үшін аз мерзім емес. Осы уақыт ішін­де талай жаңа әндер дүниеге кел­ді, репертуар толықты. Сон­дай-ақ бұрын шыққан кей туын­дыларым жаңа сипатта жаң­ғы­рып, өзгеше өңделді. Яғни жаңа кон­церттік бағдарлама жасауға мүм­кіндік туды. Әрине, бұл «осы жо­лы алдыңғы жылғы кешімде орын­далған әндердің бірде-бірін қоспаймын» деген сөз емес. Ата-ана туралы әндерімді, «Ақ келін­ді», «Оралшы, махаббатты» тың­дар­ман қауымның қай кезде бол­сын сұрайтыны анық. Сондық­тан оларды қоспай тұра алмасым белгілі. Мұны облыстардағы гаст­рольдік сапарларымнан да бай­қап жүрмін. Дегенмен кеш жаңа­лығы – жұртшылыққа бұрын ұсы­нылмаған жаңа туындыларым бол­мақ.

– Оның үстіне кеш ана рухы­на арналған перзенттік тағзым сияқ­ты...
– «Анаға сағыныш» – анам өмір­ден өткеннен кейін жазылған ән. Анаға деген аңсау мен са­ғы­ныштан туған дүние. Үлкен бол­сын, кіші болсын, тіпті алпыстағы ақ­сақалға да өмірінің бір бөлше­гін жоғалту оңай емес. Кез келген пер­зент бұл өмірде бар болсын, жоқ болсын ана алдында бас иіп, тағзым етеді. Менің ата-анам мәң­гілікке аттанып кеткендіктен, ол кісілерге деген шексіз құр­ме­тімді, сағынышымды әнге қосып сәбилік жүрегімді жұбатып жүр­ген жайым бар. Сондықтан осы кешімді аяулы анам мен ар­дақты әкемнің рухына арнағанды жөн ­көріп отырмын.

– Ақан серінің «Балқади­ша­сын» айтып, елді тәнті етіп едіңіз... Осы тәрізді басқа да туындылар орын­дала ма?
– Естайдың «Қорланын» ре­пертуарыма қостым. Алдағы кон­церттің бұдан да басқа жаңа­лық­та­рын әзірге құпия сақтай тұр­ға­ным жөн шығар. Жалпы, кейін­гі жылдары жаман жұмыс істе­меген сияқ­тымын. Бірнеше клип түсір­дім. Ескілі-жаңалы 31 туын­дыны қам­тыған жаңа толық ән жинағым жа­рық көрді. Алдағы кеште орын­далатын әндерінің тең жар­тысын «соңғы бір-екі жылда жа­зылған дүниелер» десем, артық бол­мас. Тіпті олардың арасында әлі сиясы кеппеген жаңа туын­ды­лар да бар.

– Сіз клиптеріңізді бірінен кейін бірін эфирде таратып, кө­рер­мен талқысына ұсынып жата­сыз. Бірақ мерекелік концерт­терден неге көп көрінбейсіз?
– Өз басым «шақырмаған жер­ге барма, шақырған жерден қал­ма» деген ұстанымға сүйе­не­мін. Себебі мен әнші немесе ком­позитор ретіндегі өсуім, әлде то­қырауым эфирге көп, не аз шық­қаныма тікелей тәуелді деп есеп­темеймін. Бұл өзі шартты нәрсе ғой. Мәселен, ешқандай концерт­тен қалмайтын, телерадио эфир­ден күн сайын түспейтін кейбір әншілердің әні есіңде қалмайды. Ал керісінше, көп көзінен тасалау жүрген кей өнерпаздардың шы­ғар­машылығына құрметпен қа­райсың.

– Әндеріңізді «МузАрт» тобы, Бейбіт Сейдуәлиева сияқты бірен-саран өнер иелері орындап жүр. Көбіне өзіңіз ғана орындап, аса еш­кімге көп бере бермейсіз. Бұл жолы кешке шақырған қонақ­та­рыңыз қаншалықты?
– Менің жеке концертім бол­ғандықтан көп қонақ қатыс­пайды. Өйткені шығармашылық кеш менікі болғаннан кейін, көп­шілік, негізінен, мені тыңдауға, ме­нің өнерімді тамашалауға келеді ғой. Мұндайда өзім анда-санда бір жылт етіп қойып, сахнаны мей­мандарыммен жауып отыр­сам, кім болғаным? Төрт бөліктен тұ­ратын кеш арасында бағ­дар­лама талабына сай төрт костюм ауыстырып үлгеруім үшін қажетті үзілістерді менің әндерімді орын­дай­тын әншілер жалғайды. Яғни кел­ген қонақ кеш иесімен осы­лай тығыз шығармашылық бай­ла­ныста болса ғана, бағдар­ла­ма­ның артық мүшесіне айнал­май­ды деп ойлаймын.

Айқын