Жақында Алматыда өткен концерттің бірінде жас әнші Мақпал Исабекова мен оның продюсері Эрик Тастамбеков сахна сыртында аяқ астынан шу шығарып, сол күнгі өтіп жатқан шараға қатыспай кетіп қалған көрінеді. Әңгімені әріден баста­сақ, ұзынқұлақтың айтуынша, Мақпал Исабекова көпшілікпен бірге отырмайтынын жеткізіп, өзіне жеке гример бөлмесін сұ­райды.
Алайда ұйымдастырушылар мен Рес­публика сарайының қызметкерлері мұндай мүмкіндік ешуақытта ешкімге жасалынба­ғанын айтып, халық әртістерінің өзі бір бөлмені бірнешеуі бірігіп пайдаланатынын түсіндірмек болады. Оның үстіне, әртістердің киім ауыстыратын орындары санаулы бол­ғандықтан, кеш иелері Мақпалға Қара­қат Әбілдина мен Мәдина Сәдуақасоваға көр­ші жайғасуды өтінеді. Алайда бұл ұсыныс бір-екі мәрте Ресей сахнасының дәмін тат­қан әнші мен оның продюсерінің көңілінен шықпайды. Сөйтіп, ілік іздеген екеу келі­сімге келмей, есікке қарай беттейді. Жүр­гізушілерге амал жоқ залдағы көрермендер алдында «Мақпал гастрольде жүруіне бай­ланысты, бүгінгі кешімізге келе алмады» деп өтірік айтып, ақталуына тура келеді...

Біз шоу-бизнес өкілдері арасында біраз уақыттан бері күн тәртібінен түспей келе жатқан осы келеңсіз жайт жөнінде мәсе­ленің ақ-қарасын білмек болып, әншілердің өзіне хабарласқан едік. Сыртынан күйе жаққандай болмайық деп, Мақпал Иса­бекованың продюсері Эрик Тастамбековпен де тілдестік.

Қарақат ӘБІЛДИНА:
– Әртістер бөлмесінде жалғыз Мәдина екеуміз ғана емес, басқа да әншілер болды. Бірақ кім кіріп, кім шығып жатқанына көңіл бөлмедім. Дау-жанжал туралы мүлде естіген жоқпын. Өз басым шығармашылық концертімде ғана жеке бөлмеде отырғанмын. Қалған уақытта «көппен көрген ұлы той» деп көпшілікпен бір болғанды ұнатамын. Оның үстіне, Республика сарайындағы гри­мер бөлмелері көптен бері жөндеу көрмеген. Бас сахнаның осындай жағдайын көре тұрып, ешқашан артық талап қойған емес­пін. Сондықтан «класқа» бөлінудің қажеті шамалы. «Ұлық болсаң, кішік бол» дейді. Жеке отырсаң да, елмен отырсаң да бөл­мелердің бір-бірінен айырмашылығы жоқ.

Мәдина СӘДУАҚАСОВА:
– Біз үшін өте жағымсыз оқиға болды. Елдің бәрі айтып, «не жағдай» деп сұрап жа­тыр. Бірақ өз құлағыммен Мақпалдың аузынан мұндай әңгіме естіген жоқпын. Жас әншімен жиі гастрольге шығып тұра­мыз. Жақсы қарым-қатынастамыз, сәлемі­міз түзу. Кеше ғана продюсері хабарласты. Бірақ әлгіндей әңгіме естігенде, шынымен ыңғайсыздандым. Мақпалдан ондай қылық күткен жоқпын. Мүмкін, бұл жалған дүние шығар... Біреулер ойластырған болар... Ал олардың концертке не үшін қатыспай кетке­нін білмеймін. Бұл туралы Қарақат екеуміз өзара сөйлесіп, «Мақпалдың бізге бұлай жасауы мүмкін емес» деп отырмыз. Бірақ осындайда айта кету керек, біздің әртіс­теріміздің қазақ және Қазақстан эстрадасы болып екіге бөлінетіні шындық. Орыс тілді әріптестеріміздің тек қазақша ән айтатын әншілерді бір саты төмен санайтыны жасы­рын емес. Еуропаға ұмтылғандардың ойлау дәрежесі соған жетіп тұрса, біз не істей ала­мыз? Жалпы, өзім бұлай топқа бөлінуді қабылдай алмаймын. Сахна бір болған­дықтан, онда өнер көрсететіндердің барлығы бірдей. Біреуден біреу артық немесе кем емес.

Эрик ТАСТАМБЕКОВ:
– Мұның бәрі өтірік. Шын мәнінде, олай болған жоқ. Мен өз басым сонда болдым. Бізді бір түсініксіз концерттің, түсініксіз марапаттау рәсімінде өнер көрсетуге шақыр­ды. Бар жазығымыз ұсыныстарын жерге тастамай, айтқан уақытында межелі жерге келдік. Бірақ біріншіден, бізді күзетшілер кіргізбей, біраз әуреге салды. Сөйтіп, әрең дегенде ішке өтсек, Мақпалға дайындалған бөлме жоқ. Бәрі бос емес. Қарақат пен Мә­динаны бір топ бишілермен бір бөлмеге тығып қойыпты. Бізге де «сонда барыңдар» деді. Сөз жоқ, барар едік-ау, бірақ ұйымдас­тырушылардың бізге деген мұндай «құр­меті», қалай болса, солай қарсы алуы, ұнаған жоқ. Неге алдын ала киім ауыстырып, боя­нып-сыланатын бөлме әзірленіп қоймаған? Өнер адамына тиісті жағдай жасау керектігі ескерілмеген? Есік сыртына Қарақат пен Мә­динаның аты-жөнін жазып қойыпты. Со­ған Мақпалды да қосса болады ғой... Қайда барарымызды білмедік. Демек, бұл біздің ол жерде қадіріміз жоқтығын көрсетеді. Кон­цертке де керегіміз шамалы. Сосын бұрыл­дық та, кетіп қалдық. Айта кетейін, бұл жер­де ерекше жағдай талап етіп жүрген мен ғана. Мақпал жұмған аузын ашқан жоқ.

Сонымен, «Мақпал Қарақат пен Мә­динаны менсінбей кетіпті» деп гу ете қал­ған әңгіменің ақиқаты осы. Қос әнші бұған сенер-сенбесін білмейді. Оқиғаның куәгер­лері болса, мұндай шулы көрініс бұрын-соңды әртістер арасында кездес­пегенін айтып, жағаларын ұстап отыр. Біздің ешкім­нің «сөзін сөйлеп, сойы­лын соғатын» ниетіміз жоқ. Тек сахна сыр­тындағы боя­масыз өмірді қаз-қал­пында таразыға сал­ғанды жөн көрдік. Төре­лігін айтам десеңіз­дер, өз ерік­теріңіз.

Айқын