Блогерлердің құқығын БАҚ-пен теңестіруді көздейтін нормаларды Заң жобасынан алып тастау жөнінде шешім қабылданды. Бұл туралы ҚР ақпарат және коммуникациялар министрі Дәурен Абаев Facebook-тегі жеке парақшасында жазды, — деп juldyz.kz порталы Baq.kz-ке сілтеме жасай отырып хабарлайды.
«Қымбатты достар, біздің министрлік ақпарат және коммуникациялар мәселелеріне қатысты заң жобасы бойынша түрлі алаңдарда қоғамдық талқылау өткізуде. Бұл процеске сарапшылар мен журналистер және азаматтық сектор тартылуда.
Талқылаудың барлық кезеңінде қатысушылар айрықша назар аударған нормалардың бірі жасырын пікір қалдырушылардың алдын алу (деанонимизация) мәселесі болды», – дейді Д.Абаев.
Атап айту керек, бұл норма троллингке, тексерілмеген ақпараттарды тарату мен арандатуға, экстремизмді насихаттау мен әлеуметтік жанжалдарға шақыруға қарсы күреске бағытталған еді.
«Сонымен қатар, жұмыс тобы отырыстарының шеңберінде сарапшылар мен журналистер тарапынан блогерлерді тіркеу ұсынысына қатысты да көптеген ескертпелер түсті. Біз бұл нормада желідегі танымал қолданушылардың БАҚ-пен теңестірілуін және бұл процестің ерікті түрде атқарылуын қамтамасыз етуді көздеген болатынбыз. Министрлік барынша ашықтықты ұстанғандықтан және қоғамның әрбір ұсынысын ескеруді жөн көргендіктен, бүгін жоғарыда аталған нормаларды Заң жобасынан алып тастау жөнінде шешім қабылданды», – деп түйіндеді министр.
