Бүгін ҚР Парламенті Мәжілісінің жалпы отырысында депутат Мұхтар Тінікеевтің өкілеттігін мерзімінен бұрын тоқтату туралы құжат мақұлданды, — деп juldyz.kz порталы ҚазАқпарат-қа сілтеме жасап хабарлайды.
«ҚР Конституциясының 52-бабы 5-тармағына, сондай-ақ 1995 жылғы 16 қазандағы «ҚР Парламенті және оның депутаттарының мәртебесі туралы» ҚР Конституциялық Заңының 24-бабы 3-інші және 8-тармақтарына сәйкес, ҚР Орталық сайлау комиссиясы Парламент Мәжілісінің депутаты Мұхтар Тінікеевтің өкілеттігін мерзімінен бұрын тоқтату туралы мәселені шешу үшін ұсыным енгізіп отыр», — деді ҚР Орталық сайлау комиссиясының мүшесі Марат Сәрсембаев.
Дауыс беру барысында палата депутаттары М. Тінекеевтің өкілеттігін мерзімінен бұрын тоқтату туралы құжатты мақұлдады. Естеріңізге сала кетейік, кеше Депутаттық әдеп жөніндегі кеңестің отырысы өтіп, онда депутат Мұхтар Тінікеевтің өтініш хаты қаралды. Депутат М.Б.Тінікеев орын алған жәйт бойынша кешірім сұрап, әріптестері мен сайлаушыларға өтініш хат жолдады. Ол Орталық сайлау комиссиясына депутаттық өкілеттігінен бас тартатыны туралы ресми өтінім білдіргенін айтқан. Кеңес орын алған барлық мән-жайды қарастырып, аталмыш шешіммен келісті. Депутат М.Тінікеевтің хаты Парламенттің ресми сайтында орналастырылған.
