«Өшпес тарих», «Гүл сезім», «Туған күн кешінде», «Сол шақтар-ай», «Әдемі-ау» әндерін әдемі орындайтын әнші, халықаралық байқаулардың жүлдегері Тахмина Әшімбекованың сахнадан көрінбей кеткеніне біраз уақыт болды. Бірақ өнер иесінің бұл үнсіздігі тектен-тек емес. Қарағандылық жігітке тұрмысқа шыққан ару бүгінгі таңда Әлихан есімді алтын асықтай ұлдың бесігін тербетіп отыр. Біз өнер иесін аз-кем әңгімеге тартып, шығармашылық жаңалықтарын сұраған едік...
– Көпшілік соңғы уақытта «Сіз қайда жүрсіз?» деп жиі сұрайтын болды. «Қыз мұраты-кету», яғни отбасын құру, өмірге ұрпақ әкеліп, ана атану, бала тәр­биесімен айналысу болған­дық­тан, дәл қазіргі сәтте мен осы міндетті атқарып жатырмын. Кішкентайым бұйыртса, бес айға толады. Сондықтан әлі де біраз уақыт баламның жанында отыратын ойым бар.

– Кез келген ата-ана шыр етіп дүниеге келген сәбиіне ең жақсы есімді қоюға тырысады. Өйт­кені «балаға қандай ат қо­йыл­са, оның болашақтағы тағдыры соған байланысты болады» деген ырым-наным бар. Сіз ұлыңыздың есімін таңдағанда неге сүйендіңіз?
– Баламның атын «Әлихан» деп сүйікті қайным қойды. Өзім «Ханзат» деген есімге ойланып жүр едім. Бірақ «Хан» деген тү­бірі ұнағанымен, зат деген сөз ұнамайтын. Кейінірек перзент­ха­нада жатқанымызда, қайным телефон соғып құттықтап, «Әли­хан деп атайықшы» деп өз ұсы­ны­сын жеткізді. Құлағыма жылы естілгені соншалық, бірден келіс­тім. Оның үстіне, қазақтың иба­лы келіндері қайнысының бір ауыз сөзін жерге қалдырмаған ғой. Балапаным аман-есен ер жетіп, жақсы азамат болып өссін деп тілеймін. Бұрын баласыз қалай жүргенімді білмеймін, қазір ботамды көрмесем тұра ал­маймын. Кейде жұмыстарыммен далаға шығып кетсем, қайта орал­ғанша асығамын. Әрбір қы­лығына мәз болып, ана бақытын бастан кешіп жатырмын. Оған жететін ештеңе жоқ екен.

– Жұбайыңыз немен айна­лы­сады?
– Жеке бизнесі бар. Кәсіп­кер­лікпен айналысады.

– Тұрмыс құрып жатқан әнші қыздардың қай-қайсысы­ның кү­йеу­лерін алып қарасақ та – биз­нес­мен. Олардың «Өмірлік серігім – дәрігер немесе мұғалім» деген­де­рін әзірге естіген емеспіз. Со­ған қарағанда, ел алдында жүрген арулар болашақта демеуші бо­латын азаматтарды ғана таңдай­тын сияқты...
– Біз нағыз сүйіспеншілікпен бас құрадық. Төрт жыл бір-бірі­мізді сынадық. Жұбайымның сах­наға шығуыма қарсы болған уақыттары да болды. Әйел адам бол­ғаннан кейін, үйдегі отағасы­ның айтқанын істеп, отбасылық өмірді ғана таңдаған кездерім бол­ды. Мен үшін әрдайым жан­ұя­ның берекелі тіршілігі, ты­ныш­тығы алдыңғы орында. Көтерген шаңырағымның түтіні түзу шыққаны керек. Өмірлік серігім менің оған деген осы махаб­ба­тым мен құрметімді жақсы түсін­ген болуы керек, бұл қиындық­тардың барлығы артта қалды. Қазір екі ән жаздырып, тағы бір екі-үш әнге әрлеу жасаттыру үстіндемін. Бұйыртса, жаңа жыл­ға қарсы халықпен қайта жүздес­пекпін.

– Аздаған үзілістен кейін, шығармашылығыңызға өзгеріс жасайсыз ба?
– Құдайдың берген дарыны жерде қалмайды. Бұрынғыдан да жақсы болып шыққым келеді. Өнер адамына үйде ұзақ отыра берген де болмайды екен. Ән айтқым келіп, сахнаны сағынып жүрмін. Бір жағынан аздаған үзі­ліс жасаған да дұрыс. Әйт­песе бір сарынмен, бір ағыспен кете бе­ретін көрінесің. Ал сәл аялдап, демалыс жарияласаң өт­кеніңе көз жіберіп, болашағыңа үңіле­тін мүмкіндік туатын сияқ­ты. Соңғы кездері екінші тыны­сым ашылып, үлкен шабыт үс­тін­де жүрмін. Күшіме күш келіп қо­сы­лып жатқандай... Құдай ден­саулық берсе, өнерімді әрі қарай дамыта бермекпін. Репер­туа­рыма сәл өзгеріс жасап, жыл­дамырақ ән айтуға бет бұрамын.

– Әдетте, ана атанған әнші­лер бесік жырын айтып, бала­ла­рына арнап клип түсіре бастайды. Сізде де осындай жоспар бар шығар...
– Әрине. Әлихан сәл өсіп, бір жасқа толғаннан кейін халыққа көрсетіп, батасын алғым келеді. Қазірден байқап жүрмін, балам өте зерек. Алыстағы мен ести ал­май тұрған дыбыстарға елең ете қалады. Соған қарағанда, өнерге қатысы болатын тәрізді.

Айқын