 09.06.2009 - Мақпалдың мерейі артты Жас әнші Мақпал Исабекова Өткен аптаның аяғында Республика сарайында жеке концертін қойып, орыс тіліндегі «Улетаю» атты кезекті альбомының тұсауын кесті.Әуелі кеш алдында ресми таныстырылымы өткен Мақпалдың ән жинағына тоқталсақ. Әншінің продюсері Эрик Тастембеков осы альбомды шығару үшін ұзақ еңбектенгендерін айтады. Мақпал жарнамасын жасап жүрген SunSіlk сауда белгісі өз кезегінде демеушілік танытатындықтарын жеткізіп, әндердің ойдағыдай жазылып бітуіне мұрындық болыпты. Жаңа еңбек 10 туындыдан тұрады. Олардың арасында «Бесконечность», «Москва-Астана» сияқты осыған дейін халыққа жеткендері де, жаңадан орындалғандары да бар. Альбом Мәскеу студияларының бірінде жазылған. Ал жас әншінің концертіне келсек, оған қала тұрғындары ғана емес, Мәскеуден арнайы ат арытып келген қонақтар да қатысты. Ресей эстрадасының өкілдері Сергей Жуков, Эд Шульжевский, Доминик Джокер кеш барысында қазақстандық әріптестеріне ізгі тілектерін жеткізіп, өнердегі әрбір қадамына сәт сапар тіледі. – Мен әрдайым жақсылыққа, жаңалыққа ұмтыламын. Жылт еткен жақсы дүниелер жанымды үнемі қызықтырып тұрады. Сондықтан репертуарымды, стилімді, имиджімді өзгертуден қорықпаймын. Қайта өзімнің жан-жақты талантымды көрсетіп, көрермендерімді бір образ, бір әнмен жалықтырмауға тырысамын. Және өзгелерді де қалыптасқан үрдістен шығуға, бір ізді шиырлай беруден арылуға шақырамын. Өмірлеріңізді өзгертуге жүрексінбеңіздер, – деген Мақпал осы тұрғыда жазылған «Жизнь не ждет» деген жаңа әнін жұртшылыққа тарту етті. Айтпақшы, жиі өзгеріп тұрудан қорықпайтын Мақпал, қызды-қыздымен есімін де ауыстырып, сәл болмағанда Мәскеуде «МАКІ» атана жаздады. Бастапқыда Ресей эстрадасына осы атпен танылмақ болған ару сондағы әріптестерімен ақылдаса келе, райынан қайтқан. Өйткені достарының басым бөлігі қазірдің өзінде Мәскеуде аты шығып үлгерген әншінің орта жолдан бүркеншік есім жамылғаны ерсі көрінетіндігін айтыпты. Айқын Сайтта жарияланған: http://juldyz.kz Тікелей сілтеме: http://juldyz.kz/index.php?name=news&op=view&id=31 |