Ақтөбе облысында Әйтеке биге ескерткіш орнатылды, — деп juldyz.kz порталы ҚазАқпаратқа сілтеме жасап хабарлайды.
Тәуелсіздіктің 25 жылдығы аясында Қарабұтақ ауылында Қазақ жұртының тыныштығы мен тұтастығы жолында көсемдігімен де, шешендігімен де қызмет еткен дарабоз тұлға, елдің бірлігін нығайтуға үлес қосқан атақты үш биіміздің бірі — Әйтеке би ескерткіші ашылды.
Төле және Қазыбек билермен бірге қалың қазағының мұңын мұңдап, жоғын жоқтаған Әйтеке би — философ, дала данышпаны, мемлекет қайраткері. Ол 25 жасында Кіші жүздің бас биі болған, Әз Тәуке хан құрған билер кеңесінің мүшесі, абыз баба, дарабоз тұлға қандай құрметке де лайық. Әйтеке биді есте қалдыру бағытында біраз шаруалар да жасалды. Облыс орталығында ескерткіші орнатылды. Оның атында аудан, көшелер, ауыл бар. Осы Қарабұтақ өңірінде Әйтеке бидің 350 жылдығы аталып өтті.
Биіктігі 7 метр болатын Әйтеке бидің ескерткіші Қарабұтақ ауылына кіреберістегі үш жолдың, «Батыс Еуропа — Батыс Қытай» халықаралық көлік дәлізінің Қызылорда бағытына және Қостанай бағытына бұрылатын айрығына орнатылған. Мұның өзі — үш бағытқа жүретін автокөлік жүргізушілері мен жолаушылардың назарына бірден ілігетін көрнекті орын. Бұл ескерткішті орнатуға «Қазавтожол» ҰК» АҚ Ақтөбе облыстық филиалының директоры Бағлан Баймағамбетов пен бас мердігер, «Қазавтожол» республикалық мемлекеттік кәсіпорны Ақтөбе облыстық филиалының директоры Әкімжан Өтемұратов бастамашы болды.
